युरोप, २७ जुलाई / राष्ट्र संघीय युद्ध अपराध सम्बन्धी अदालतले युद्ध अपराधको आरोप लागेका कम्बोडियाका भूतपूर्व खमेर रुज शासक काइङ गुएक एभलाई दोषि ठहर गर्दै पैंतीस वर्षको जेल सजाय सुनजाएको छ।
खमेर रुज सरकारका बरिष्ठ अधिकारी मध्ये एक काइङ गुएक एभमाथि सोमबार अर्न्तराष्ट्रिय अदालतमा भएको अन्तिम सुनुवाइमा उहाँलाई सो सजाय सुनाइएको हो। राष्ट्र संघिय अदालतका अभियोक्ताहरुले युद्ध अपराधको आरोप लागेका काइङ गुएक एभलाई चालीस वर्षको काराबास सजाय दिनु पर्ने माग गरेका थिए।
अदालती सुनुवाइ भैरहेको राजधानी नोम्पेनस्थित अदालत परिसरमा सुरक्षा ब्यवस्था कडा बनाईएको थियो। युद्ध अपराधको आरोप लागेका खमेर रुज शासक गुएक एभलाइ अदालतमा बुलेट प्रुफ कारमा ल्याइएको थियो।
सोमबार अदालत उपस्थित गराइएका ६७ वर्षीय गुएक एभ माथि युद्ध अपराध, नरसंहार, यातना र हत्याकाण्ड अभियोग लागेका थिए। राष्ट्रसंघ र कम्बोडियाली सरकार बीच भएको एक दशक लामो वार्ता पछि सन् दुइ हजार छमा खमेर रुज विरुद्ध युद्ध अपराधको मुद्धा राष्ट्र संघिय अदालतमा दर्ता गरिएको थियो।
युद्ध अपराधको अभियोग स्वीकार गरिसकेका डच गुएक एभ सजाय भोग्ने एक मात्र खमेर रुज शासक हुन्। डच खमेर रुज शासनकालमा बन्दीहरुलाई यातना दिन बनाइएको तुओल स्लेङ्ग नामक कुख्यात बन्दी गृहको प्रमुख हुनुहुन्थ्यो। सो बन्दी गृहमा सोह्र हजार मानिस मारिएको बताइन्छ।
