काठमाण्डौ, ३० जुलाई, १४ साउन / विकिनी किलरको रुपमा परिचित फ्रान्सेली नागरिक चार्ल्स शोभराजलाई अमेरिकी महिलाको हत्या गरेको आरोपमा सर्वोच्च अदालतले सर्वस्वसहित जन्मकैदको फैसला सुनाएको छ । सर्वोच्चले २०६२ सालमा पुनरावेदन अदालत पाटनको निर्णयलाई सदर गरेको हो ।
सर्वोच्च अदालतका न्यायाधीश रामकुमार प्रसाद साह र गौरी ढकालको संयुक्त इजलासले पुनरावेदन अदालतको फैसलालाई सदर गर्ने निर्णय सुनाएको हो । विगत ५ वर्षदेखी नेपालको जेलमा रहेका ६६ वर्षीय शोभराजमाथिको मुद्धामा लामो छलफल र बहस पछि सर्वोच्चले जन्मकैदको फैसला सुनाएको हो ।
अमेरिकी महिला कोन्निजो व्रोनिचिजको हत्या गरेको अभियोगमा न्यायाधिस विश्वम्भर श्रेष्ठको इजालसमा काठमाण्डौ जिल्ला अदालतले २०६१ साउन २८ गते कर्तव्य ज्यान मारेको ठहर गर्दै सर्वस्वसहितको जन्म कैदको सजाय सुनाएको थियो । त्यसका विरुद्ध पूनरावेदन अदालत पाटनमा दिएको रिटमा पनि सोही फैसलालाई सदर गरेपछि उनि २०६२ साल कार्तिक २४ गते सर्वोच्चमा पुगेका थिए ।
शोभराज जाली राहदानीका साथ २०३२ सालमा काठमाण्डौ आइ पुष ६ गते साँगामा अमेरीकी महिला व्रानिचिजको हत्या गरी सोही दिन थाइल्याण्ड गएका थिए । सोही हत्याको अभियोगमा २०३३ साल असोज ७ गते काठमाण्डौ जिल्ला अदालतमा मुद्दा दायर भएको थियो ।
हत्या पछि फरार रहेका शोभराजलाई २०६० साल असोज २ गते राजधानीको याक एण्ड यती होटेलको क्यासिनोबाट प्रहरीले पक्राउ गरेको थियो । शोभराजका विरुद्ध विश्वका विभिन्न मुलुकका अदालतमा मुद्दा अझै वाँकी रहेका छन । उनले करिव ४० वर्ष विभिन्न अपराधमा ९ वटा देशमा जेल जीवन विताइ सकेका छन् ।
यसैबीच, शोभराजकी पत्नी निहिता विश्वासले अदालतको निर्णयप्रति आक्रोस व्यक्त गर्दै न्यायधिशले भष्ट्रचार गरी यस्तो फैसला सुनाएको दावी गरेकी छन् ।
शोभराजविरुद्धको सर्वोच्चको निर्णयलाई उनले सर्वोच्चकै प्रांगणमा भ्रष्ट न्यायाधीशको निर्णय भएको भनि टिप्पणी गरेकी थिइन । शोभराजको पक्षमा वहश गरेकी उनकी सासु एंव वकिल शकुन्तला थापाले अदालतको निर्णय विरुद्ध अन्तर्राष्ट्रिय अदालत जाने वताएकी छन् ।
